Presideanta Stubb galleda Ohcejoga ja Anára

17.05.2024

Dásseválddi presideantta kansliija
Dieđáhus 29/2024
17.5.2024

Dásseválddi presideanta Alexander Stubb galleda Lappi Ohcejogas ja Anáris miessemánu 23.–24. beaivve.

Galledeapmi álgá Ohcejoga Njuorggámis duorastaga miessemánu 23. beaivve. Presideanta Stubb oahpásmuvvá Njuorggáma vuolleskuvlii ja doppe son vástida skuvla oahppiid gažaldagaide. Skuvlagalledeami maŋŋá presideanta deaivvada beaiveborramuša olis Ohcejoga gieldda njunnošiiguin ja bálgosa ovdaolbmuiguin ja sii ságastallet guvlui ja ealáhusaide gullevaš áigeguovdil áššiid birra.

Presideanta Stubb oaidnala olbmuiguin Ohcejoga Gilidállu Giissás sullii diibmu 13.30 rájes.

Eahketbeaivve presideanta Stubb galleda Geavu luonddumeahci. Prográmmas lea oahpásmuvvan Lappi dutkanlágádussii Geavu gieddestašuvdnii, ságastallamat Meahciráđđehusa ovddasteaddjiiguin ja vázzinmohkki.

Bearjadaga miessemánu 24. beaivve Anáris presideanta Stubb deaivvada  sámedikki ovddasteaddjiiguin ja ságastallá singuin sápmelaččaid áigeguovdil áššiid birra. Presideanta oahpásmuvvá maid jagi eurohpalaš musean válljejuvvon Siida Sámemuseai ja luondduguovddážii.

Avvilis presideanta deaivvada Anára gieldda njunnošiiguin ja ságastallá singuin Davvi-Lappi áigeguovdil gažaldagaid birra. Presideanta deaivvada maid Anára bálgosiid ovddasteaddjiiguin.

Lappi galledeapmi nohká Avvila Kaarre skuvla- ja kulturguovddážii, man šiljus presideanta oaidnala olbmuiguin sullii dii. 14.30.