Pargovyeimipalvâlusah uđâsmuvvii ivemolsomist – tiervâpuáttim Tave- já Nuorttâ-Laapi pargolâšvuotâkuávlu äššigâssân

02.01.2025

Pargovyeimipalvâlusah sirdâšuvvii ivemolsomist staatâst kieldáid. Mij keččâlep turviđ äššigâssáid njyebžilis palvâlusâid sirdâšummuddoost, mutâ palvâlusâi kiävtust sättih kuittâg leđe hemâdâsah já poođhah ive vuossâmui peeivij ääigi.

PI-uđâsmittem, mii poođij vuáimán ive aalgâst, lii historjálávt vijđes uđâsmittem, mii kuáská oles kieldâkiädán já lii vaattâm kieldâin maaŋgâ syergi ráhtádâttâm já valmâštâllâm. Návt vijđes uđâsmitmân lohtâseh sirdâšummuddost meid hástuseh, moh hettejeh palvâlusâi njyebžilis toimâm koskâttuvâi.

Tooimâs ive aalgâst algâttâm Tave- já Nuorttâ-Laapi pargolâšvuotâkuávlu viggá turviđ äššigâsâi palvâlusâid, mutâ aalgâst sierâlágán hemâdâsah, kiävttupoođhah já ááijánmeh láá máhđuliih.

Veikâ PI-toimâttuvah láá lopâttum, IJP-kuávdái sehe PI-toimâttuvâi ovdedem- já haldâttâhkuávdáš ađai KEHA-kuávdáš haaldâš puátteevuođâst-uv pargo-occei já pargoadeleijei jiešášástâllâmkanava Työmarkkinatori (Pargomarkkântori). Pargomarkkântori tuáimá te puátteevuođâst-uv šleđgâlâš ášástâllâmkanavan. Pargomarkkântori Asiointi (Ášástâllâm)-uásist tun puávtáh almottâttâđ pargo-occen, almottiđ nubástusâin jieijâd pargoucâmist tâi kyeđđiđ ohtâvuođâväldimpivdem.

Jis tun koolgah registeristuđ pargo-occen jiehke peesâ čáládâttâđ vuáhádâhân, te tun puávtáh väldiđ ohtâvuođâ Tave- já Nuorttâ-Laapi pargolâšvuotâkuávlu almos ohtâvuotânumerân: puhelinnummeer 0400 610 870 palvâl argâpeeivij tme 9–15.

Luuvâ lase pargovyeimipalvâlusâin Tave- já Nuorttâ-Laapi pargolâšvuotâkuávlust taa: Pargovyeimipalvâlusah | Suáđigil kieldâ

Täst lii koččâmuš

Ivemolsomist almolij pargovyeimipalvâlusâi ornimovdâsvástádâs sirdâšui staatâst kieldáid. Uđâsmittem mield Suomân šoddii 45 kieldâi hammim pargolâšvuotâkuávlud, moh västideh haaldâtlávt palvâlusâi orniimist.

Laapist tooimâ algâttii nelji pargolâšvuotâkuávlu: Merâ-Laapi, Tave- já Nuorttâ-Laapi, Rovaseutu já Tuodâr-Laapi já Pello pargolâšvuotâkuávluh.

Tave- já Nuorttâ-Laapi pargolâšvuotâkuávlu hämmejii čuávuvááh käävci kieldâd: Aanaar, Kiemâjävri, Pelkosnjargâ, Puáššu, Salla, Suovâkuoškâ, Suáđigil já Ucjuuhâ. Suáđigil lii pargolâšvuotâkuávlu ovdâsvástádâskieldâ.

PI-palvâlusâi sirdâšum kieldáid uáivild sirdâšum staatâ kuávdásmittum vuáháduvâst piäđguidittum kieldâvuáđulii palvâlusvuáhádâhân.