BE-bálvalusat sirdásit gielddaide 1.1.2025

Boahtte jagi álggu rájes BE-bálvalusat sirdásit gielddaide ja stáhta bargo- ja ealáhusdoaimmahagat dahjege BE-doaimmahagat heaittihuvvojit. Bargofápmobálvalusain boahtá oassi guhtege gieldda vuođđobálvalusaid, seammaláhkai go vaikkoba čuvgehus- dahje servodathuksemii laktáseaddji bálvalusat.

Bargofápmobálvalusaid bokte sihke persovdna- ja fitnodatáššehasat ožžot rávvagiid ja ráđi barggu ohcamii ja bargiid rekryteremii sihke čehppodaga ovddideapmái.

Davvi- ja Nuorta-Lappi barggolašvuođaguovlu álggaha doaimmas

BE-ođastusas Supmii šaddá ođđa málle, mas gielddat dahje gielddaid hábmen barggolašvuođaguovllut vástidit bargofápmobálvalusain.

Mii Anára / Giemajávrri / Pelkosenniemi / Posio / Salla / Suovvaguoikka / Soađegili / Ohcejoga gielddas ordnet bargofápmobálvalusaid ovttas čieža eará gielddain ja hábmet Davvi- ja Nuorta-Lappi barggolašvuođaguovllu. Barggolašvuođaguovllu vástugieldan doaibmá Soađegilli.

Davvi- ja Nuorta-Lappi barggolašvuođaguovllu gávcci gieldda leat

• Anár
• Giemajávri
• Pelkosenniemi
• Posio
• Salla
• Suovvaguoika
• Soađegilli
• Ohcejohka

Maid nuppástus mearkkaša?

Jos don leat juo BE-bálvalusaid áššehas, de don it dárbbaš dahkat maidige erenomážiid, vaikko bálvalusfálli lotnašuvvá jagimolsašumis. Mii dieđihat vejolaš nuppástusain dáin siidduin ja váldit dutnje oktavuođa dárbbu mielde maiddái persovnnalaččat.

Jos dárbbašat bargofápmobálvalusa vuosttas geardde, sáhtát álo jorgalit iežat gieldda beallai, gos du rávvejit ovddosguvlui. Lassedieđu ja ráđi barggu ohcamii dahje bargiid rekryteremii oaččot maiddái iežat gieldda neahttasiidduin dahje Työmarkkinatoris.

Työmarkkinatori, bargguid ja bargiid gávnnadanbáiki

Go ozat bargguid dahje bargiid, don galggat čálihit álo sisa Työmarkkinatorii, mii doaibmá bargguid ja bargiid gávnnadanbáikin.

Työmarkkinatoris gávnnat bargoeallimii laktáseaddji dieđu, bálvalusaid ja rabas bargosajiid. Go čálihat iežat sisa Työmarkkinatorii, beasat dahkat ovdamearkka dihte bargoohcanprofiilla dahje bargosadjealmmuhusa. Työmarkkinatoris gávnnat maiddái viidát rávvagiid áššiid dikšuma várás.

Työmarkkinatori Guovlosiidduin gávnnat áigeguovdilis dieđu guovllu rabas bargosajiin, bálvalusain ja ođđasiin sihke dehálamos oktavuođadieđuid.